網紅的藏寶箱要成功，就要自宮（下）
上集：https://bit.ly/3rzddR3
阿邦愈講愈興奮：「一齊做女人，即刻變『人上人』！」
「吓，自己走去變性，即係自宮啫，練《葵花寶典》咩？」我好猶豫：「同埋我覺我自己係男人，我鍾意嘅係女人，你都知我follow嘅全部都係女神。」
阿邦問：「咁有冇一個女人，你覺得你有機會溝到……唔係，係掂到手仔？」
「邊有可能呢？我又唔係好有錢，又唔係好靚仔……我望吓就滿足啦。」我下意識答。
阿邦笑咗出聲：「咁咪係囉，你鍾意女人，但呢世都唔會溝到女，咁你鍾意女人有咩用？」
我無言以對。
阿邦繼續講：「相反，如果你做女人，我哋一對『姐妹花』，大把人溝，下半世都唔駛做啦。」
阿邦仲講咗好多我應該變性嘅原因，例如我生得矮，變性後就係男人最鍾意嘅「嬌小可愛型」；
例如我父母成日鬧我係廢柴、搵唔到錢，我變性一定係皆大歡喜……
我忍唔住問：「你自己去變咪得囉，做咩要拉埋我落水？」
「一世人兩兄弟，覺得正咪推介畀你。」阿邦話鋒一轉：「同埋我自己都有少少驚，切JJ喎，有你陪好似冇咁驚嘛。」
識咗阿邦咁多年，我都知佢唔係壞人。
但終身大事，我都唔可以倉促決定，我決定先陪阿邦去變性，睇吓個環境。
阿邦嘅變性手術非常順利，一入去就麻醉，冇受幾多痛苦。
醫生幫佢做埋隆胸手術，仲整咗少少容。
阿邦打扮好，滿臉嬌羞咁同我講：「我依加叫Bonnie。」
嗰一刻，我真係有啲心動。
我突發奇想：「不如你同我一齊，我咪唔駛變性，仲有個老婆囉。」
「痴線，我變性係為咗做少奶奶，唔係嫁畀你呢啲窮鬼。」阿邦……唔係，Bonnie翻咗個白眼。
我先意識到，無論幾多年兄弟，喺「美好生活」面前都冇情講。
要得到美好嘅生活，我只有自己努力，自己變性。
我參加咗「自願變性計劃」，醫生畀我簽手術同意書，仲好詳盡咁講解手術過程，有埋影片同圖片。
但我見到嗰啲片，幻想到跟隨我多年嘅生殖器官，即將會被殘忍地切落嚟，丟落垃圾埇，我真係接受唔到。
就算貧窮，就算俾人睇唔起，就算收唔到政府嘅補貼，我都要堅持我嘅性別……我係一個男人！
「我唔做手術啦！」我臨陣退縮。
由於呢個變性手術係自願性質，所以都冇人阻攔我，我一個人返到屋企，繼續做我嘅Loser。
無論命運係點，總要堅持自己嘅信念。
我係咪好型呢？
第二年，政府招募嘅「自願變性者」數量唔夠，按照規定，要抽人去服「變性役」。
我被抽中，冇人問我願唔願意，幾個工作人員上門，將我捉去醫院，綁喺床上，一支麻醉針打落嚟……
我就咁變咗一個女人，仲冇埋政府畀嘅「自願變性津貼」。
無論命運係點，總要堅持自己嘅信念。
然後，命運會花更大嘅力氣，摧毀你嘅信念。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #要成功就要自宮
Search